بیت تعریف کنیت و پار و پریارل دلم مهلی گرهته

مو سی کاره ی ملوس بور و سیسارل دلم مهلی گرهته

بشینیت دور تا دورم ککایل میر شکالل

بگیتون سیم وپازنل و برنو و قطارل دلم مهلی گرهته

زدن هی بی وفایل برد نومیدی و سینه

جگرم خینیه بی نشت خارل دلم مهلی گرهته

چطری سیت بگم مشکول دویی یادتونه

خدا سی پسکل و دنگه ی درایل دلم مهلی گرهته

پسین روز اشکنون پیشه ی چپونلُ

مو سی زلف چویل و گر مهارل دلم مهلی گرهته

قطور بازی دورل زیر بیدل یادتونه

جوونل پازنون یابو سوارل دلم مهلی گرهته

دل محمود ودرد اومه و یاد عشقل پاک

بیو لیلی بریم تا حد مزارل دلم مهلی گرهته